د ښاري اوبو رسولو او فاضلابو امارتي شرکت کې د درېیو اداري بستونو رقابتي ازموینه ترسره شوه
د شایستهسالارۍ د اصل د پلي
کېدو، د آزادې سیالۍ د زمینې د برابرولو او وړ او مسلکي کدرونو ته د کاري فرصتونو
د برابرولو په موخه، د ښاري اوبو رسولو او فاضلابو امارتي شرکت د خپلو درېیو اداري
بستونو لپاره د تحریري ازموینې بهیر د شرکت د اداري چارو رئیس ښاغلي شیخ سمیع الله
نورستاني، د مالي او حسابي چارو رئیس ښاغلي ضیاءالحق همتي، د سوداګریزو چارو رئیس ښاغلي
انجنیر عبدالمتین مطمئین، د فاضلابو چارو رئیس ښاغلي انجنیر فایق الله جمال او د
امارتي شرکتونو لوی ریاست د استازي ښاغلي اکمل منګل په حضور کې، د ازموینو کمېټې
تر څارنې لاندې ترسره شو.
په دې پړاو ازموینو کې له ۲۵ څخه زیاتو شرایطو پوره کوونکو نوماندانو ګډون
کړی و او د مزارشریف د سوداګریز آمر، د سوداګریز ریاست د پانګونې جلب کارپوه او د
کندهار د معدني اوبو د تولید فابریکې د آمر بستونو لپاره یې سیالي ترسره کړه.
ټاکل شوې ده، له ګډونوالو څخه
هغه درې تنه چې د تحریري او تقریري ازموینو پړاوونه په بریالیتوب سره بشپړ، لوړې
نمرې ترلاسه او د ازموینو کمېټې ټاکلي معیارونه پوره کړي، په یادو بستونو کې پر
دندو وګومارل شي.