د اوبو رسولو پروژو څارنه؛ شاوخوا ۱۴۰۰ کورنۍ به د څښاک له صحي اوبو څخه برخمنې شي
د کابل ښار د کارته سخي سیمې د اوسېدونکو د
څښاک د صحي اوبو د ستونزو د حل په موخه، د ښاري اوبو رسولو او فاضلابو امارتي شرکت
اجرائیوي رئیس، ښاغلي مولوي غلامالرحمن کظیم، د شرکت د عملیاتي چارو رئیس انجنیر
نصیر احمد احمدي، د تخنیکي چارو رئیس انجنیر ندي الله نیازی او د کابل زون د اوبو
رسولو رئیس انجنیر شفیعالله زاهدی په ملتیا، یاده سیمه له نږدې وکتله او له ځايي
خلکو سره یې مستقیمې خبرې وکړې.
د شرکت اجرائیوي رئیس د کارته سخي سیمې له
مشرانو او سپین ږیرو سره د میر زمان خان په جومات کې وکتل. په دې لیدنه کې د سیمې
اوسېدونکو د څښاک د صحي اوبو د کمښت ستونزې له مسؤلینو سره شریکې کړې او څرګنده یې
کړه چې نږدې ۱۴۰۰ کورنۍ په دې سیمه کې د اوبو له کمښت سره مخ دي. هغوی
د شرکت له مشرتابه څخه وغوښتل چې ژر تر ژره دې ستونزې ته رسېدنه وشي.
د شرکت اجرائیوي رئیس د ځايي استازو د وړاندیزونو
او نظریاتو له اورېدو وروسته وویل: «ژر به د شرکت تخنیکي ډلې سیمه وګوري او له اړینو
ارزونو وروسته به د موجودو ستونزو د حل لپاره عملي لارې چارې په پام کې ونیول شي.»
همدارنګه، اجرائیوي رئیس او مل پلاوي د
اوبو رسولو له روانو پروژو څخه هم څارنه وکړه، چې په کې د چمن حضوري له ساحې څخه
تر ابن سینا روغتون پورې د انتقالي پایپ پروژه، په دهمزنګ سیمه کې د شبکې پراختیا
او د سیلو او دهبوري په مسیرونو کې د پایپونو تعویض شامل و، او اړوندو مسؤلینو ته یې
لازمې لارښوونې وکړې.
د ښاري اوبو رسولو او فاضلابو امارتي شرکت
ژمن دی چې د کابل ښار په بېلابېلو سیمو کې د اوبو رسولو شبکې پراخې کړي، څو د ښار
اوسېدونکو ته د صحي څښاک اوبو دوامداره لاسرسی باوري کړي.