د ځان بساینې پر لور یو بل مهم ګام؛ د ۶۰۰ ملي متره څخه د لوی قطر اوبو رسولو پایپونو تولید
دامارتي شرکتونو لوی ریاست اړوند ښاري اوبو رسولو او فاضلابو امارتي شرکت، د
تولیدي ظرفیتونو د پراختیا او ځانبساینې د تحقق په موخه، په پام کې لري چې د اوبو
رسولو شبکو لپاره د اړتیا وړ پولیاتلین پایپونو د تولید فابریکه د دغه شرکت په
چوکاټ کې جوړه او ګټې اخیستنې ته وسپاري.
دغه طرحه د ښاري اوبو رسولو او فاضلابو امارتي شرکت د اجرائیوي
رئیس، ښاغلي مولوي غلامالرحمن کظیم، په نوښت او لارښوونه ترتیب شوې ده.
د همدې موخې لپاره، د شرکت مشرتابه پلاوي د تخنیکي رئیس ښاغلي
انجنیر نديالله نیازي، د عملیاتي رئیس ښاغلي انجنیر نصیر احمد احمدي او د تجارتي
رئیس ښاغلي انجنیر عبدالمتین مطمئن په ملتیا، د کابل ښار د امین آباد سیمې څخه د
فابریکې د جوړېدو د مناسب ځای د تثبیت په موخه لیدنه او ارزونه ترسره کړه.
د شرکت اجرائیوي رئیس د یادې لیدنې پر مهال، د دې طرحې د موخو
او جزئیاتو په اړه معلومات وړاندې کړل او زیاته یې کړه، چې په لومړي پړاو کې به په
دې فابریکه کې د اوبو رسولو د بېلابېلو پروژو د اړتیاوو سره سم، د بېلابېلو قطرونو
او اندازو پولیاتلین پایپونه تولید شي.
نوموړي همدارنګه وویل، چې د دې فابریکې د تولید ظرفیت به د ۶۰۰ ملي متره څخه د لوی قطر لرونکي پولیاتلین پایپونه هم په بر
کې ونیسي، چې د هغو په تولید سره به د شرکت د اوبو لېږد شبکو د اړتیاوو لویه برخه
په هېواد دننه پوره شي او د دغو پایپونو پر وارداتو به د پام وړ اتکا راکمه شي.
د ښاري اوبو رسولو او فاضلابو امارتي شرکت مسؤلینو تل د خدمتونو
د کیفیت لوړولو، د تخنیکي زیربناوو د پراختیا او د کورنیو ظرفیتونو د پیاوړتیا په
موخه هڅې کړې دي. د دغې فابریکې جوړول د ځان بساینې، د لګښتونو د کمولو او د هېواد
د اوبو رسولو پروژو د اړتیاوو د پوره کولو په برخه کې یو مهم او اغېزناک ګام بلل کېږي.