خبرونه

امارتي شرکتونو لوی ریاست اړوند د اوبو رسولو او فاضلابو امارتي شرکت د خالي بستونو د وړ او مسلکي کادرونو د جذب په موخه، د آزادې سیالۍ له لارې د عملیاتي  ریاست اړوند د ولایتونو د همغږۍ آمر بست او د تخنیکي ریاست اړوند د پروژو د نظارت او تطبیق آمر بستونو لپاره تحریري ازموینه ترسره کړه.

دغه ازموینه د اوبو رسولو او فاضلابو امارتي شرکت د اجرائیوي رئیس ښاغلي مولوي غلام الرحمن کظیم، د امارتي شرکتونو لوی ریاست د استازي ښاغلي اکمل منګل او د ازموینو د اخیستلو د موظفې کمېټې تر مستقیمې څارنې لاندې ترسره شوه، چې پکې له ۳۰ څخه زیاتو پر شرایطو برابرو ګډونوالو برخه اخیستي وه.

د ښاري اوبو رسولو او فاضلابو امارتي شرکت اجرائیوي رئیس ښاغلي مولوي غلام الرحمن کظیم د ازموینې له بهیر څخه د لیدنې پر مهال، ټولو ګډونوالو ته د بریا هیله وکړه او څرګنده یې کړه چې د استخدام په پروسه کې د شفافیت، عدالت او وړتیا اصل ته ژمنتیا لري.

نوموړي زیاته کړه: د آزادې سیالۍ بهیر ټولو وړ او تحصیل کړو ځوانانو ته، پرته له قومي، مذهبي او یا بل هر ډول تړاو څخه، د ګډون مساوي فرصت برابروي. موږ ژمن یو چې مسؤلیتونه به اهل او وړ کسانو ته وسپارل شي.

د یادونې وړ ده چې د دې پړاو له ګډونوالو څخه به دوه تنه، د تحریري او تقریري ازموینو له بریالي ترسره کولو وروسته، د موظفې کمېټې له ارزونې وروسته انتخاب او په یادو بستونو کې به وګمارل شي.