د ښاغلي امیرالمؤمنین شیخ
صاحب هبة الله اخندزاده حفظه الله د حکم په اساس، د امارتي شرکتونو د نظار هیئت رئیس
مولوي احمد جان بلال له لورې د چارو ادارې
د نماینده ګانو، مخکیني رئیس انجنیر نعمت الله احمدي، مرکزي رئیسانو او امرینو
په حضور کې د ښاري اوبو رسولو او فاضلابو امارتي شرکت لپاره مولوي صاحب غلام
الرحمن کاظیم د نوي رئیس په توګه معرفي کړل شو.
یاد مراسم چې د قرانکریم
د سو مبارکو ایاتونو په تلاوت سره پیل شول؛ په پیل کې د امارتي شرکتونو د نظار هیئت
رئيس ښاغلي مولوي احمد جان بلال د ښاري اوبو رسولو او فاضلابو امارتي شرکت د نوي
رئيس د معرفۍ اړوند د ښاغلي امیرالمؤمنین حفظه الله د حکم لوستلو ترڅنګ یاد شرکت یو
له بریالیو او بنسټیزو امارتي شرکتونو څخه وباله او زیاته يې کړه: تغیرات او تبدیلي
د اداراتو له اصولو څخه شمیرل کیږي، او د ښاري اوبو رسولو او امارتي شرکت د لاسته
راوړنو څخه د خوښۍ څرګندولو ترڅنګ یې د مخکیني رئیس کړنې د ستایلو وړ وبللې او نوي
رئیس ته یې د ښه خدمت دعا وکړه.
د غونډې په دوام کې د ښاري
اوبو رسولو او فاضلابو امارتي شرکت مخکني رئيس ښاغلي انجنیر نعمت الله احمدي د تیرو
کلنو په موده کې د شرکت دلاسته راوړنو، فعالیتونو، تکمیل شویو پروژو، تر کار لاندې
پروژو، او تر پلان لاندې پروژو په اړه د لنډ راپور وړاندې کولو ترڅنګ، د نوي رئیس
لپاره د مزید خدمت کولو هیله څرګنده کړه.
په پای کې د ښاري اوبو
رسولو او فاضلابو امارتي شرکت نوي رئیس مولوي غلام الرحمن کاظیم د ښاغلي امیرالمؤمنین
حفظه الله له اعتماد څخه د مننې ترڅنګ زیاته کړه: د افغانستان مسلمان ملت ته د
خدمت کولو په موخه به د شرکت خدماتو پراخولو کې هیڅ ډول هڅه ونه سپموم.