خبرونه

د ښاري اوبو رسولو او فاضلابو امارتي شرکت لوی رئيس ښاغلي مولوي غلام الرحمن کظیم او ورسره مل پلاوي د نیمروز ولایت څخه وروسته د فراه ولایت له ښاري اوبو رسولو آمریت څخه د لیدنې ترڅنګ د یاد ولایت مقام رهبرۍ سره ولیدل.

په یاده لیدنه کې د شرکت لوی رئیس مولوي غلام الرحمن کظیم د اوبیزو سرچینو، د شبکو پراختیا او فراه ښار اوسیدونکو ته د چوپړتیاوو وړاندې کولو په اړه د یاد ولایت والي مولوي صاحب رهبر سره معلومات شریک کړل.

د ولایت رهبرۍ مقام د یاد ولایت د ښاري اوبو رسولو آمریت د هڅو ستایلو ترڅنګ ژمنه وکړه چې د شبکو پراختیا او نورو چارو کې به د دې آمریت سره لا زیاتې مرستې ولري.

په پای کې د شرکت لوی رئیس د فراه ښار اوبو رسولو آمریت، اوبو رسولو شبکو، تأسیساتو او د اوبو تولیدي او توزیعې مرکزونو څخه لیدنه ترسره کړه او د یاد آمریت کارکوونکو نظریاتو، وړاندیزونو او ستونزو اوریدلو وروسته یې د چارو د لا ښه ترسره کیدو په موخه اړینې لارښونې وکړې.