خبرونه

د ۴۵۰ میلیونه افغانیو په ارزښت د اوبو رسولو دغه ستره پروژه د جوزجان والی، د امارتي شرکتونو لوی رئیس او اوبو رسولو امارتي شرکت اجرائیوي رئیس له لوري رسماً پرانیستل شوه.

دغه مراسم چې شبرغان ښار د ښاروالۍ د هوټل په تالار کې ترسره شول، د امارتي شرکتونو مسؤلینو، د جوزجان ولایت د رهبرۍ چارواکو، د امارت لوړپوړو مسؤلینو، علماوو، متنفذینو او د دغه ولایت اوسیدونکو هم په کې ګډ‌ون کړی وه.

د جوزجان والي ښاغلي قاري ګل حیدر شفق د اوبو رسولو امارتي شرکت له مسؤلینو په خاص ډول د اوبو رسولو شرکت د رهبرۍ مقام ښاغلي مولوي غلام الرحمن کظیم  څخه په دغه ولایت کې د اوبو رسولو په برخه کې د زحمتونو او خدمتونو ستاینه وکړه او د شبرغان ښار له اوسیدونکو یې غوښتنه وکړه تر څو د اوبو رسولو شبکو په ساتنه او په وخت سره د اوبو د مصرف بیلونو په ورکولو سره خپل مسؤلیت اداء کړي.

همدارنګه د امارتي شرکتونو لوی رئیس ښاغلي مولوي احمدجان بلال د دغې پروژې سرته رسول او ګټه اخیستنې ته سپارل یې په عامه المنفعه کارونو کې لوی ګام وباله او د څښاک پاکو اوبو ته یې د ښاریانو لاسرسی په اړه خلکو ته مبارکې وویله.

د دغه مراسمو په دوام کې د ښاري اوبو رسولو او فاضلابو امارتي شرکت اجرائیوي رئیس د دغې پروژې د اهمیت او مصارفو په اړه معلومات وړاندې کړل او زیاته یې کړه: دغه پروژه چې نیږدي د ۴۵۰ میلیونه افغانیو په ارزښت د اسلامي امارت د پراختیايي بودیجي په ملاتړ د راسخ او صفت قراردادي شرکتونو له لوري بشپړه شوه، چې (۷۳۰۰) کورنۍ به یې د څښاک پاکو اوبو څخه ګټه واخلي.

د شرکت اجرائیوي رئیس زیاته کړه: موږ خپل ملت ته ډاډ ورکوو چې د څښاک پاکو اوبو په برخه کې د دوی اړتیاوو پوره کولو ته موږ چمتو یو او د خپل توان تر حده به یې خدمت وکړو.

په دغه مراسمو کې د بریښنا شرکت اجرائیوي رئیس ښاغلي داکټر عبدالباري عمر او د دغه ښار یو شمير نورو مشرانو د اوبو او دغې پروژې پر اهمیت خبرې وکړې او د اړوند مسؤلینو څخه د دغې پروژې د بشپړولو په اړه ستاینه او مننه وکړه.

د یادونې وړ ده چې د ۱۴۰ کیلومترو د اوبو د انتقالي او ویش شبکه، ۳ بابه ۶۰۰ مترمکعب ځمکنۍ ذخیرې، ۱ باب ۲۵۰ متر مکعب لوړه ذخیره، ۲ حلقي د ژورو څاګانو کیندل، ۲ بابه د څاه ګانو لپاره ودانۍ او د تاسیساتو د ساتنې لپاره یو احاطوي دیوال هم په دې پروژه کې شامل دي.