خبرونه

د ښاري اوبو رسولو او فاضلابو امارتي شرکت اجرائیوي رئیس ښاغلي مولوي غلام الرحمن «کظیم» د شرکت عملیاتي رئیس ښاغلي انجینر نصیر احمد «احمدي» او د کندز زون  اوبو رسولو ریاست رئیس ښاغلي انجنیر نصرالدین نصرت په ملتیا  د بغلان ولایت له والي ښاغلي مولوي عبدالرحمن سره ولیدل.

په دې لیدنه کې د ښاري اوبو رسولو او فاضلابو امارتي شرکت اجرائیوي رئيس د بغلان ولایت محترم مقام سره د اوبو رسولو چوپړتیاوو، پروژو او پلانونو په اړه معلومات شریک کړل.

په دوام يې د بغلان ولایت والي ښاغلي مولوي عبدالرحمن د ښاري اوبو رسولو او فاضلابو امارتي شرکت اجرائیوي رئیس ته د ښه راغلاست ویلو ترڅنګ په دې ولایت کې د اوبو رسولو امارتي شرکت سره د هر راز همکارۍ ژمنه وکړه.

له دې وروسته د شرکت اجرائیوي رئیس د پل خمري ښار اوبو رسولو آمریت کارکوونکو سره ناسته ترسره کړه؛ د ناستې په پيل کې د دې آمریت کارکوونکو د شرکت مشرتابه مقام ته د ښه راغلاست ویلو تر څنګ د ښار اوسیدونکو ته د یاد آمریت د وړاندي شویو چوپړتیاوو راپور په مفصل ډول وړاندې کړ، او همدارنګه په دغه اداره کې مسؤلینو د هغو ستونزو او وړاندیزونه یادونه وکړه چې د اوبو رسولو خدماتو لپاره ګټور تمامیږي، چې د شرکت مشرتابه مقام له لورې ورته یادو وړاندیزونو او ستونزو ته د رسیدو اطمینان ورکړل شو.

د دغې لیدنې په دوام د شرکت اجرائیوي رئیس  د اوبو رسولو آمریت د اوبیزو سرچینو ، لیږدونکو او توزیعي پروژو څخه لیدنه ترسره کړه ، او همدارنګه د ښار اوسیدونکو ته د مؤثرو چوپړتیاوو، د اوبو رسولو د پروژو د تأسیساتو ساتنې، او د اوبیزو سرچینو څخه د سالمې ګټې اخیستنې په اړه یې کارمندانو ته اړینې لارښوونې وکړي.