خبرونه

د ښاري اوبو رسولو او فاضلابو امارتي شرکت اجرائیوي رئیس ښاغلي مولوي غلام الرحمن کظیم، د ختیځ زون (جلال‌اباد) د اوسیدونکو د څښاک صحي اوبو اړتیاوو د پوره کولو په موخه د ختیځ زون د اوبو رسولو ریاست رئیس او د یاد زون د برېښنا شرکت له رئیس سره ولیدل.

په دې لیدنه کې، اجرائیوي رئیس د ګرمۍ په موسم کې، په ځانګړې توګه د هېواد په ګرمو سیمو کې، د اوبو تولید په ډریدو د ټېنګار ترڅنګ زیاته کړه: "د ننګرهار او لغمان ولایتونو اوسیدونکي د ګرمۍ په موسم کې د څښاک صحي اوبو ته ډېره اړتیا لري او باید د دې اړتیا د پوره کولو لپاره لا زیاتې هڅې وشي."

وروسته د ختیځ زون د اوبو رسولو رئیس ښاغلي  یارمحمد محمدي، ، د دې زون د اوبو تولید او توزیع په اړه لنډ راپور وړاندې کړ او خپلې نظریې، وړاندیزونه، د شبکو د پراختیا پلانونه، او د دې زون شته ستونزې د شرکت له رهبرۍ مقام سره شریکې کړې.

همداراز، په دې لیدنه کې محترم مولوي جان ‌محمد انقلابي، د ختیځ زون د برېښنا شرکت رئیس، ژمنه وکړه چې د اوبو رسولو سایټونو ته به د برېښنا د برابرولو په برخه کې همکاري کوي، او د دې تطبیق پر څرنګوالي یې له اجرائیوي رئیس سره بحث او نظرونه تبادله کړل.

په پای کې، اجرائیوي رئیس د ستونزو د حل په موخه د اوبو د تولید او توزیع، او همداراز د برېښنا د کارولو د پلان جوړونې په برخه کې اړوند ریاست ته اړینې لارښوونې وکړې.