خبرونه

په کندهار ښار کې لاندې د اوبو رسولو څلور لویې  پروژې د ځانګړو مراسمو په ترڅ کې رسماً پرانیستل شوې: د لوی ویالې ساحې د اوبو رسولو پروژه، د ارغنداب څخه تر اډې پورې د پایپ انتقال پروژه، د عدالت د گذر د اوبو رسولو پروژه، او د نجیب نمرو په سیمه کې د پایپونو د بدلون پروژه.

یادې پروژې د کندهار ښار د محترم مرستیال والي، د امارتي شرکتونو د محترم لوی رئیس مولوي احمد جان بلال، او د ښاري اوبو رسولو او فاضلابو امارتي شرکت اجرائیوي رئیس  ښاغلي مولوي غلام الرحمن کظیم له لوري، د یو شمېر امارتي ادارو د مسئولینو، د کندهار زون اوبو رسولو رئیس، د یاد ریاست د کارکوونکو، د گذر وکیلانو او د اړوندو سیمو د اوسېدونکو په حضور کې، رسماً پرانیستل شوې او ګټې اخیستنې ته وسپارل شوې.

په مراسمو کې د کندهار ولایت محترم مرستیال، د امارتي شرکتونو او د اوبو رسولو مسئولینو د هڅو او زحمتونو مننه وکړه، او د اوبو ارزښت ته یې د اسلام له نظره اشاره وکړه، او خلکو له لورې یې د شبکو د ساتنې او د اوبو د مصرف په سپما خبرې وکړې.

ورپسې، د امارتي شرکتونو لوی رئیس ښاغلي مولوي احمد جان بلال خبرې وکړې، او ویې ویل چې دغه د اوبو رسولو پروژې د هېواد په کچه د عام المنفعه روانو پروژو برخه ده. نوموړي د یادو پروژو د بریالیتوب مبارکي د کندهار ښاریانو او د اوبو رسولو شرکت اجرائیوي رئیس مولوي غلام الرحمن کظیم ته ورکړه.

همداراز، د اوبو رسولو او فاضلابو امارتي شرکت اجرائیوي رئیس ښاغلي مولوي غلام الرحمن کظیم د کندهار ولایت له رهبرۍ او مسئولینو څخه د پروژو د پلي کولو په برخه کې د همکاریو مننه وکړه، او د دغو څلورو پروژو په اړه یې تفصیلي معلومات وړاندې کړل.

هغه زیاته کړه: "الله (تعالی) ته شکر ادا کوو چې د دغو څلورو پروژو په پرانیستلو سره له (۹۰) زرو څخه زیات پيرودونکي په کندهار ښار کې د څښاک پاکو اوبو ته لاسرسی پیدا کړ."

نوموړي وویل: د لوی ویالې د اوبو رسولو پروژه چې د ۴۲۳ میلیونه افغانیو په ارزښت، د شرکت د پراختایي بودجې له لارې تمویل شوې، د ارغنداب څخه تر اډې پورې د پایپ انتقال پروژه د (۱۲۶) میلیونه افغانیو په ارزښت د یونیسف ادارې له خوا تمویل شوې، او پاتې دوه پروژې چې په نهمه او اوومه ناحیه کې د شبکو د پراختیا او پایپ بدلون پروژې دي، د (۱۵) میلیونه افغانیو په ارزښت د سره صلیب نړیوالې کمېټې (ICRC) له لورې تمویل شوي دي.