خبرونه

د اوبو رسولو امارتي شرکت د شپږو زونونو او زرنج ریاست د کړنو او لاسته راوړنو د راپور ورکونې د ناستې په دوهمه ورځ د ښاري اوبو رسولو او فاضلابو امارتي شرکت د هرات، مزار شریف او کابل زونونو په خپل وار د 1403 کال د وروستیو شپږ میاشتو او 1404 کال لومړنیو دریو میاشتو په مالي او حسابي، عملیاتي، تجارتی او اداري څانګو کې خپل راپور د ناستې ګډونوالو ته وړاندې کړ.

په دې ناسته کې د زونونو رئيسانو د خپلو ریاستونو ستونزې، ننګونې، اندونه او وړاندیزونه د شرکت له رهبرۍ او مرکزي رئیسانو سره شریک کړل، څو لازمې لارښوونې ترلاسه کړي او حل‌لار ورته ولټول شي.

د ښاري اوبو رسولو او فاضلابو امارتي شرکت اجرائیوي رئیس ښاغلي مولوي غلام الرحمن کظیم په دې ناسته کې د اوبو رسولو د زونونو له هڅو او زحمتونو د مننې ترڅنګ ډاډ ورکړ د اوبو رسولو زونونو ټولو وړاندیزنو، ستونزو او په ځانګړي توګه هیوادوالو ته اوبو رسولو خدماتو په لاره خنډونو ته به ژر تر ژره رسېدګي وشي.

همداراز اجرائیوي رئیس زیاته کړه: ډېری ستونزې د مسؤلیتونو له غفلت او د خلاقانه مدیریت له نشتوالي رامنځته کېږي، که دا نه وای، نو له نیمایي څخه زیاتې ننګونې به د مدبرانه مدیریت؛ ستونزې به د پیاوړې ارادې او هڅې؛ او پاتې نور به د زغم او صبر له لارې حل کېدای.