د ښاري اوبو رسولو او
فاضلابو امارتي شرکت په پام کې لري، چې د کابل ښار اوسېدونکو ته د پاکو اوبو د
برابرولو په موخه، د اوبو رسولو یو لړ مهمې پروژې پیل کړي.
په همدې تړاو، د یاد شرکت
اجرائیوي رئیس محترم مولوي غلام الرحمن کظیم، د شرکت عملیاتي رئیس او د کابل زون د
اوبو رسولو ریاست مسؤلینو په ملتیا، د کابل ښار د اوبو رسولو منځمهاله MTP1)) پروژې لیدنه وکړه.
د کابل ښار منځمهاله
پروژه (MTP1) د یاد ښار د اوبو رسولو له سترو پروژو څخه ده،
چې نړیوالو معیارونو ته په کتو طرحه او ډیزاین شوې ده. د دې پروژې له تطبیق سره به
د کابل ښار څهباندې (۲۳۰,۰۰۰) اوسېدونکې د پاکو اوبو څخه برخمن شي.
اجرائیوي رئیس د پروژې د
تولیدي سرچینو او پمپ ستیشن څخه د لیدنې
پر مهال ټینګار وکړ، چې یاده پروژه دې بېرته پیل او بشپړه شي.
د یادونې وړ ده، چې تر دې
دمه د یادې پروژې څهباندې ۷۰ سلنه کار بشپړ شوی، خو دا مهال د بودیجې د کمښت له
امله یې چارې په ټپه ولاړې دي. د ښاري اوبو رسولو امارتي شرکت مشرتابه هڅه کوي، چې
د داخلي او یا هم بهرني ملاتړ له لارې د دې پروژې پاتې کارونه بشپړ او ګټې اخیستنې
ته وسپاري.