خبرونه

دونۍ/دوشنبه 3 صفر المظفر 1447

محترم الحاج خلیفه سراج‌الدین حقاني (حفظه الله) د افغانستان اسلامي امارت د کورنیو چارو وزیر، د ښاري اوبو رسولو او فاضلابو امارتي شرکت له اجرائیوي رئيس، محترم مولوي غلام‌الرحمن کظیم سره د لیدنې پر مهال څرګنده کړه چې د اسلامي امارت مشرتابه د دې لپاره بېلابېل برنامې په پام کې لري چې د هېوادوالو لپاره د څښاک پاکو اوبو د تولید او رسونې چارې پراخې شي.

نوموړي زیاته کړه چې د څښاک پاکو اوبو ته لاسرسی د هر افغان یو اساسي حق دی، او ویې ویل:

"اوبه زموږ له ملي شتمنیو څخه دي؛ د اوبو سپما، د ژوند سپما ده!"

په یاده لیدنه کې، محترم مولوي غلام‌الرحمن کظیم د کابل ښار د اوبو د کمښت او عمومي وضعیت په اړه مفصل معلومات وړاندې کړل، او د ښاري اوبو رسولو او فاضلابو امارتي شرکت هغه لنډمهاله او منځمهاله پلانونه یې له خلیفه صاحب سره شریک کړل، چې د هېوادوالو لپاره د څښاک پاکو اوبو د برابرولو په موخه طرحه شوي دي.

په پای کې، محترم الحاج خلیفه سراج‌الدین حقاني (حفظه الله) ژمنه وکړه چې د څښاک پاکو اوبو د برابرولو او د اوبو رسونې د پروژو په پلی کولو، په ځانګړي ډول د کابل ښار د منځمهالې سترې پروژې (MTP) – چې له پلي کېدو سره به یې له ۲۳۰,۰۰۰ زیات ښاري وګړي د څښاک پاکو اوبو ته لاسرسی ومومي – په برخه کې هر اړخیز ملاتړ او همکاري کوي.