خبرونه

د ښاري اوبو رسولو او فاضلابو امارتي شرکت اجرائیوي رئیس ښاغلي مولوي غلام‌الرحمن کظیم،  د چارو د ښه تنظیم، د اوبو رسولو د خدمتونو د چټکتیا، د ستونزو د حل او د فعالیتونو د راپور اخیستنې په موخه، د اوبو رسولو شپږو زونونو له رئیسانو او د زرنج ښار د اوبو رسولو ریاست رئيس سره؛ چې د مرکزي ریاستونو رئیسانو هم په کې ګډون درلود آنلاین غونډه ترسره کړه.

اجرائیوي رئیس په دې غونډه کې د دیني چارو د تنظیم او تطبیق په برخه کې د د دعوت او ارشاد محترم آمریت د لارښوونو پر عملي کېدو ټینګار وکړ او څرګنده یې کړه چې د شرکت د دعوت او ارشاد محترم آمر د ټولو زونونو د څارنې په سفر بوخت دی، نو ځکه ټول زونونه مکلف دي چې د ورکړل شویو هدایتونو له مخې بې‌ځنډه اقدامات ترسره کړي او د همدې لارښوونو سره سم عمل وکړي.

ورپسې د مرکزي ریاستونو رئیسانو د یو لړ موضوعاتو په اړه خبرې وکړې؛ لکه: طلبات، عواید او مصارف، د منقول او غیرمنقول شتمنیو د اسنادو تنظیم او طی مراحل، په وخت راپور ورکول، میټرلوستنه، د عددي مشترکینو پر میټري سیستم بدلول، د پلېټونو نصب، د مشترکینو د ساحو GPS کول او د داخلي او خارجي مفتشینو د موندنو پر بنسټ اقدامات. د دغو موضوعاتو په تړاو هر زون په خپل وار ځوابونه وړاندې کړل.

همدارنګه په دې غونډه کې د زونونو رئیسانو د شرکت د رهبرۍ او په ځانګړي ډول د اجرائیوي ریاست له ملاتړ او ډاډ مننه وکړه. هغوی د خپلو زونونو د فعالیتونو لنډ راپور وړاندې کړ او خپلې ستونزې، وړاندیزونه، اړتیاوې او ننګونې یې د غونډې له ګډونوالو سره شریکې کړې. د بحث او نظرونو له تبادلې وروسته، اجرائیوي رئیس اړینې پرېکړې ترسره او هر اړخیزې لارښوونې یې صادرې کړې.