خبرونه

د سره صلیب نړیوالې کمیټې په ۲۰۲۵ میلادي کال کې د ښاري اوبو رسولو او فاضلابو له امارتي شرکت سره په ګډه ۲۵ پروژې ترسره کړې. په دغو پروژو کې د قندهار، هرات، جلال اباد، بدخشان، کندز، پروان، خوست او مزار شریف په ولایتونو کې د اوبو د فټینګ او مېټرونو برابرول، د اوبو د تولید او وېش د سرچینو سولري کول، د شبکو پراختیا، او د شبکو د ساتنې، څارنې او ترمیم په برخه کې د کارکوونکو د وړتیاوو لوړول شامل وو.

په دې غونډې کې چې د ۲۰۲۵ کال په ترڅ کې د سره صلیب نړیوالې کمیټې او د ښاري اوبو رسولو او فاضلابو امارتي شرکت ترمنځ د همکاریو د بیا کتنې او په ۲۰۲۶ کال کې د دغو همکاریو د دوام په موخه جوړه شوې وه، د ښاري اوبو رسولو او فاضلابو امارتي شرکت اجرائیوي رئیس ښاغلي مولوي غلام الرحمن کظیم د دغې موسسې له مرستو او همکاریو مننه وکړه او د لا زیاتو مرستو پر دوام یې ټینګار وکړ.

 همدارنګه د سره صلیب نړیوالې کمیټې د اوبو او استوګنې څانګې همغږې کوونکې آغلې وېرونیک وېبر د ښاري اوبو رسولو او فاضلابو امارتي شرکت سره د دغه بنسټ د همکاریو درې میاشتنی راپور وړاندې کړ او زیاته یې کړه: د سره صلیب نړیواله کمیټه تل د افغانستان د خلکو تر څنګ ولاړه ده، او په ۲۰۲۶ کال کې یې د اوبو رسولو په برخه کې له ښاري اوبو رسولو او فاضلابو امارتي شرکت سره د لا ډېرو همکاریو پروګرامونه په پام کې نیولي دي.

د غونډې په پای کې پرېکړه وشوه چې د غوره خدماتو وړاندې کولو او د اوبو رسولو شبکو پراختیا په موخه، د اوبو رسولو ټول لومړني پلانونه او طرحې چمتو او اجرائیوي پرېکړې په راتلونکې غونډه کې ونیول شي.