خبرونه

د ښاري اوبو رسولو او فاضلابو امارتي شرکت اجرائیوي رئیس، ښاغلي مولوي غلام الرحمن کظیم، د عملیاتي چارو رئیس انجنیر نصیر احمد احمدي او تخنیکي چارو رئیس انجنیر ندی الله نیازی په ملتیا، خوست ولایت ته سفر وکړ. د دې سفر موخه د اوبو د تولید او وېش مرکزونو څارنه او د ولایتي چارواکو او کارمندانو سره کتنه وه.

د سفر په پیل کې، اجرائیوي رئیس او ورسره مل پلاوي د خوست له محترم والي مولوي عبدالله مختار سره ملاقات وکړ. په دې لیدنه کې د اوبو رسولو د آمریت د روانو فعالیتونو، وروستیو لاسته راوړنو او په دغه ولایت کې د شرکت د راتلونکو انکشافي پلانونو په اړه تفصیلي خبرې وشوې، چې د والي صاحب له لوري په بشپړ ډول تائید او وستایل شوې.

له والي صاحب سره تر کتنې وروسته، ښاغلي اجرائیوي رئیس د خوست ښار د اوبو رسولو آمریت له کارمندانو سره غونډه ترسره کړه. د کارمندانو د نظرونو او وړاندیزونو له اورېدو وروسته، نوموړي د خپلو خبرو په ترڅ کې وویل: "د خلکو لپاره د اغېزمنو او دوامداره خدماتو وړاندې کول زموږ اساسي دنده ده؛ بناءً د ښاریانو د څښاک اوبو د برابرولو په موخه باید په پوره اخلاص او تعهد سره شپه او ورځ هڅې وشي."

د سفر په وروستۍ برخه کې، اجرائیوي رئیس د اداري کمپلکس او ټول ولایت لپاره د فاضلابو د غیر متمرکزې تصفیې خونې لپاره ځانګړي شوي ځایونه له نږدې وکتل او اړوندو مسؤلینو ته يې د چارو د پرمختګ په اړه اړینې لارښونې وکړې.