د شرکت اجرائیوي رئیس: د هرې ادارې اصلي پانګه، د هغې بشري ځواک دی او د کارمندانو د ظرفیت لوړول، د نوښت زمینه برابروي.
1405/01/16
د
اوبو رسولو او فاضلابو امارتي شرکت اجرائیوي رئیس ښاغلي مولوي غلام الرحمن
کظیم د سره صلیب نړیوالې کمېټې (ICRC) له
استازو سره په لیدنه کې وویل؛ د اوبو رسولو امارتي شرکت د کارکوونکو د مسلکي وړتیاوو
د پراختیا او هېوادوالو ته د غوره خدماتو وړاندې کولو په موخه، په روان کال کې
هدفمند روزنیز پروګرامونه په پلان کې لري چې دا به د دوامدارې ودې او کاري ظرفیت د
لوړېدو لامل شي.
د اوبو رسولو رئيس زیاته کړه: د سره صلیب کمېټې
په ۱۴۰۴ کال کې له دغه شرکت سره ډېرې همکارۍ کړي او هیله من دی چې په راتلونکي کال
کې هم د هغوی له همکاریو برخمن شي.
ورپسې د سره صلیب نړیوالې کمېټې باصلاحیته
استازې مېرمن ویرونیک ویبر د اوبو رسولو شرکت د مسوولینو له همکاریو مننه وکړه او
د دې کمېټې د همکاریو په دوام یې د ژمنې ترڅنګ وویل: «موږ د مخکې له مخکې ټاکل شوي
جدول سره سم او د اوبو رسولو شرکت د مسوولینو په همغږۍ خپل پروګرامونه پر مخ وړو.»نوموړې
زیاته کړه: د دواړو لورو ترمنځ د شوې هوکړې له مخې، د اوبو رسولو د کارکوونکو د
ظرفیت لوړونې پروګرامونه په کاري لومړیتوبونو کې دي او مقدماتي چارې به یې ډېر ژر
پیل شي.
دا ناسته چې د اوبو رسولو امارتي شرکت د
مرکزي رئيسانو په شتون کې د دغه ریاست په مقر کې جوړه شوې وه، له هر اړخیزو بحثونو
وروسته د همکاریو د پروګرامونو پر څرنګوالي او د وخت پر ټاکلو لازمې پریکړې وشوې.