د ښاري اوبو رسولو امارتي شرکت او یونیسف ترمنځ د همغږۍ او همکاریو د پراختیا غونډه ترسره شوه.
1405/01/26
د دوه اړخیزو همکاریو د پیاوړتیا او پراختیا
په موخه، د ښاري اوبو رسولو امارتي شرکت او د ملګرو ملتونو د ماشومانو د ملاتړ
صندوق (یونیسف) ترمنځ ګډه غونډه، د یاد شرکت د اجرائیوي رئیس ښاغلي مولوي غلامالرحمن
کظیم او د مرکزي ریاستونو د مسؤلینو په حضور کې، د یونیسف له استازو سره ترسره
شوه.
په دې غونډه کې د یونیسف د اوبو او روغتیا
ساتنې برخې رئیسې آغلې فرای تونوهم، د دواړو لوریو ترمنځ له روانو همکاریو څخه د
خوښۍ څرګندونه وکړه او د دغو همکاریو پر دوام او لا پیاوړتیا یې ټینګار وکړ. نوموړې
وویل: یونیسف ژمن دی چې د ښاري اوبو رسولو او فاضلابو امارتي شرکت سره په نږدې همغږۍ
کې، د څښاک صحي اوبو د برابرولو او د فاضلابو د سیسټمونو د مدیریت د ښه والي په
برخه کې اغېزمن او رغنده رول ولوبوي.
نوموړې همدارنګه څرګنده کړه چې دغه اداره هڅه
کوي د کورني او نړیوال خصوصي سکتور د ظرفیتونو په جلب او جذب سره، د اوبو او روغتیا
ساتنې په برخه کې د عامه او خصوصي مشارکت (PPP) لپاره د پانګونې زمینه برابره کړي، څو له دې لارې په ټول
هېواد کې د اوبو رسولو خدماتو ته دوامداره لاسرسی پراخ شي.
ورپسې، د ښاري اوبو رسولو او فاضلابو
امارتي شرکت اجرائیوي رئیس ښاغلي مولوي غلامالرحمن کظیم، د یونیسف له دوامدارو
همکاریو څخه د مننې ترڅنګ، د اوبو رسولو د پروګرامونو په ملاتړ کې د دې ادارې پر
مهم رول ټینګار وکړ او ویې ویل: د ښاري اوبو رسولو او فاضلابو امارتي شرکت یو
خدماتي بنسټ دی او زموږ اساسي موخه ښاریانو ته د څښاک صحي اوبو برابرول دي.
نوموړي همدارنګه د هېواد د اوبو رسولو د
وضعیت په اړه لنډ معلومات وړاندې کړل او زیاته یې کړه: د هېواد په بېلابېلو ولایتونو
کې یو شمېر د اوبو رسولو پروژې د عامه او خصوصي مشارکت (PPP) تر چوکاټ لاندې پلي کېږي او په دې برخه کې
د خصوصي سکتور د پانګونې لپاره لازمې اسانتیاوې برابرې شوې دي.