خبرونه

د ښاري اوبو رسولو او فاضلابو امارتي شرکت اجرائیوي رئیس، ښاغلي مولوي غلام‌الرحمن کظیم، د سمنګان ولایت د اوبو رسولو آمریت له لیدنې وروسته، د سمنګان ولایت له محترم والي الحاج ملا محمد شعیب رسالت، سره وکتل.

په دې لیدنه کې د اوبو رسولو رئیس د خرم او سارباغ ولسوالۍ د اوبو لېږدونکې شبکې په اړه خبرې وکړې چې د موسمي سېلابونو له امله زیانمنه شوې او له ګواښ سره مخ ده.

همداراز، د شرکت اجرائیوي رئیس په نږدې ورځو کې د دغه ولایت په «حسن خېلو» سیمه کې د اوبو رسولو د یوې نوې پروژې د پیل خبر ورکړ او د پروژې ټول جزئیات یې د ولایت له مقام سره شریک کړل.

د سمنګان ولایت والي ښاغلي الحاج ملا محمد شعیب رسالت په دغه ولایت کې د اوبو رسولو د خدماتو د پراختیا ستاینه وکړه او زیاته یې کړه: «اوبه ژوند دی؛ موږ به د اړوندو ادارو او ښاریانو په همکارۍ د اوبو رسولو د شبکو ساتنې ته پوره پام کوو. د خرم او سارباغ ولسوالۍ د شبکې په اړه به هم جدي پرېکړې وشي او په لومړي فرصت کې به یې ستونزې حل شي.»

په پای کې پرېکړه وشوه چې د ولایتي مقام، د ټولګټو وزارت او د ښاري اوبو رسولو او فاضلابو امارتي شرکت څخه یو ګډ تخنیکي ټیم سیمې ته واستول شي، ترڅو له سروې او ارزونې وروسته عملي اقدامات ترسره شي.