د ختیځ زون د اوبو رسولو
۱۴ واټرپمپونو لپاره د ۶ کیلوولټ نوي برېښنايي فیډر پروژه د ښاري اوبو رسولو او
فاضلابو امارتي شرکت د اجرائیوي رئیس ښاغلي مولوي غلامالرحمن کظیم له لوري، د
شرکت د تخنیکي چارو رئیس، د ختیځ زون د اوبو رسولو رئیس، د ننګرهار ولایت مقام استازي،
او د یو شمېر امارتي ادارو مسؤلینو او د یاد زون د کارکوونکو په ګډون د ځانګړو
مراسمو په ترڅ کې ګټې اخیستنې ته وسپارل شوه.
د مراسمو په پیل کې د ښاري
اوبو رسولو او فاضلابو امارتي شرکت اجرائیوي رئیس ښاغلي مولوي غلامالرحمن کظیم وویل،
یاده پروژه د ۱۴ میلیونه افغانیو په ارزښت د ښاري اوبو رسولو او فاضلابو امارتي
شرکت او د سره صلیب نړیوالې کمېټې (ICRC) په مالي همکارۍ
پلې شوې ده.
د شرکت اجرائیوي رئیس زیاته
کړه، د دې پروژې په بشپړېدو سره به شاوخوا یوولس زره کورنۍ د څښاک پاکو او صحي
اوبو ته په غوره او دوامدار ډول لاسرسی ومومي. نوموړي همداراز د هېوادوالو د خدمت
په برخه کې د شرکت پر ژمنتیا ټینګار وکړ او له ښاریانو یې وغوښتل چې د اوبو رسولو
شبکو په ساتنه کې له شرکت سره همکاري وکړي.
ورپسې د ننګرهار ولایت
مقام استازي محترم مولوي سمیعالله د اوبو د ارزښت او اهمیت په اړه خبرې وکړې او
له خلکو یې وغوښتل چې د اوبو له بېځایه مصرف او ضایع کېدو څخه ډډه وکړي.
په دوام کې د شرکت د تخنیکي
چارو رئیس ښاغلي انجینر نديالله نیازي د پروژې تخنیکي اړخونو ته په اشارې وویل،
دغه پروژه د اوبو رسولو سیستم د برېښنايي ستونزو د حل، د برېښنا د دوامدار تأمین،
د واټرپمپونو د فعالیت د ښه والي او ښاریانو ته د څښاک پاکو اوبو د منظمې رسونې په
موخه پلې شوې ده.
د مراسمو په پای کې د ختیځ
زون د اوبو رسولو او فاضلابو رئیس ښاغلي مولوي یارمحمد محمدي په یاده پروژه کې له
همکارو بنسټونو څخه مننه وکړه او د اوبو رسولو خدمتونو د لا ښه والي په موخه یې د
ورته بنسټیزو او پراختیایي پروژو پر دوام ټینګار وکړ.