د ښاري اوبو رسولو او
فاضلابو امارتي شرکت او د یونیسف مؤسسې ترمنځ د ښاري فاضلابو د مدیریت په برخه کې
د ګډو همکاریو د پیاوړتیا په موخه، د یاد شرکت اجرائیوي رئیس ښاغلي مولوي غلامالرحمن
کظیم د یونیسف مؤسسې د اوبو، فاضلابو او حفظالصحې د چارو له مسؤلې آغلې فرای
تنهام سره لیدنه او خبرې اترې ترسره کړې.
په دې غونډه کې د ښاري
اوبو رسولو او فاضلابو امارتي شرکت اجرائیوي رئیس د هېواد په ښارونو او مهمو
مرکزونو کې د فاضلابو د مدیریت د اوسني وضعیت په اړه معلومات وړاندې کړل او د دې
ادارې د فعالیتونو، ظرفیتونو او شته امکاناتو په اړه یې هر اړخیز توضیحات ورکړل.
نوموړي څرګنده کړه چې د ښاري اوبو رسولو او فاضلابو امارتي شرکت د فاضلابو د مدیریت
د ښهوالي او پراختیا لپاره مشخص پروګرامونه او طرحې تر کار لاندې لري، چې عملي کېدل
یې وخت، پانګونې او د همکارو بنسټونو پراخو همکاریو ته اړتیا لري.
ورپسې آغلې فرای تنهام د
فاضلابو د اغېزمن مدیریت پر اهمیت او د عامې روغتیا په تأمین کې د هغه پر رول ټینګار
وکړ او ویې ویل چې یونیسف مؤسسه له دې برخې څخه خپل ملاتړ ته دوام ورکوي. هغې
همدارنګه څرګنده کړه چې یاد بنسټ هڅه کوي، د مستقیمو همکاریو ترڅنګ، د خصوصي سکټور
او د ښاري اوبو رسولو او فاضلابو امارتي شرکت ترمنځ د همغږۍ او ګډ کار زمینه هم
برابره کړي، څو د فاضلابو د مدیریت بهیر لا اغېزمن پرمخ ولاړ شي.
د غونډې په بله برخه کې د
ښاري اوبو رسولو او فاضلابو امارتي شرکت د فاضلابو چارو رئیس انجنیر فایقالله
جمال د پریزنټېشن له لارې د خپل ریاست اړوند فعالیتونه، لاسته راوړنې، روان پروګرامونه
او راتلونکي پلانونه ګډونوالو ته تشریح او وړاندې کړل.
د غونډې په پای کې دواړو
لوریو د همغږۍ پر دوام او خلکو ته د اوبو رسولو او حفظالصحې خدمتونو د لا ښه والي
لپاره پر ګډو هڅو ټینګار وکړ.