جلالاباد ښار کې د ۲۱ میلیونه افغانیو په ارزښت د اوبو رسولو د یوې پروژې د بنسټ ډبره کېښودل شوه
جلالاباد ښار کې د ۲۱ میلیونه افغانیو په ارزښت د
اوبو رسولو د یوې سترې پروژې د بنسټ ډبره د ښاري اوبو رسولو او فاضلابو امارتي
شرکت مشرتابه، ختیځ زون د اوبو رسولو رئیس، یو شمېر مسؤولینو
او د امارتي ادارو د استازو په حضور کې کېښودل شوه.
د ښاري اوبو رسولو
او فاضلابو امارتي شرکت اجرائیوي رئیس، مولوي غلام الرحمن کظیم، د پروژې د کار د
پیل په مراسمو کې وویل: «هېوادوالو ته د اوبو رسولو خدمتونه وړاندې کول زموږ د
مسؤولیت ترڅنګ یو ستر ویاړ هم دی. د خوښۍ ځای دی چې دا پروژه د هېواد د خپلواکۍ او
آزادۍ ورځې د نمانځنې د پروګرامونو په لړ کې پیلېږي.»
ښاغلي زیاته کړه،
چې د دې پروژې په بشپړېدو سره به د جلال اباد ښار له اووه زرو څخه ډېر اوسېدونکي
د څښاک پاکو او صحي اوبو څخه برخمن شي او تمه ده چې د پروژې چارې به په راتلونکو
اوو میاشتو کې بشپړې شي.
د شرکت اجرائیوي
رئیس همدارنګه د اوبو په سپما او د اوبو رسولو شبکو په ساتنه کې د هېوادوالو پر
مسؤولیت ټینګار وکړ او ویې ویل، چې په ټول هېواد کې د نوو اوبو رسولو شبکو د پراختیا
او د زړو شبکو د بدلولو چارې دوام لري.
د ختیځ زون د اوبو
رسولو رئیس، مولوي یارمحمد محمدي، د دې پروژې د جزیاتو په اړه معلومات ورکړل او ویې
ویل، چې دغه پروژه د خلکو د اړتیاوو پر بنسټ د جلال اباد ښار د څلورمې ناحیې اړوند
د «زاړه څارنوالۍ» په سیمه کې پلې کېږي.
همدارنګه د ولایت
مقام د فرهنګي چارو مسؤول، مولوي سمیعالله سمون، د اوبو رسولو خدمتونو د پراختیا
په برخه کې د ښاري اوبو رسولو او فاضلابو امارتي شرکت له فعالیتونو او هڅو څخه
قدرداني وکړه او د ننګرهار ولایت په ټولو سیمو کې یې د اوبو رسولو شبکو پر پراختیا
ټینګار وکړ.
د یادونې وړ ده چې
دغه شبکه ۲۴.۵ کیلومتره
اوږدوالی لري. د پروژې په بشپړېدو سره به د سیمې پخوانۍ د اوبو رسولو شبکه هم ترمیم
شي او د زرګونو اوسېدونکو لپاره به څښاک پاکو او صحي اوبو ته د لاسرسي زمینه
برابره شي.